WAKUU WA WILAYA NA WAKURUGENZI WA HALMASHAURI ZA MKOA WA MBEYA KIKAANGONI

MBEYA

WAKUU wa Wilaya na Wakurugenzi wa Halmashauri za mkoani Mbeya sasa wako kikaangoni baada ya kutakiwa wajieleze ni kwa nini wameshindwa kutekeleza agizo la Kupiga Chapa Mifugo.

Wakuu wa wilaya na Wakurugenzi watatakiwa kuwasilisha barua za kujieleza leo(Januari 30) kwa Ofisi ya mkuu wa mkoa wa Mbeya kisha na yeye aambatanishe na takwimu za utekelezaji kwa kila Halmashauri na kuzituma kwa waziri mwenye dhamana.

Mkuu wa mkoa wa Mbeya,Amos Makalla alitoa agizo hilo jana(Januari 30) alipokuwa kwenye Kikao cha Kuandikishana mikataba kati ya Shirika la Ujerumani la Giz na Hospitali na vituo vya Afya vilivyoingia Ubia wa utoaji huduma za Afya na Serikali ambapo pia wakuu wa wilaya na wakurugenzi wa Halmashauri pia walihudhuria.

Makalla alisema kati ya Halmashauri zote za mkoani hapa ni moja tu ya Jiji la Mbeya iliyotekeleza agizo hilo kwa asilimia 100 huku nyingine zote zikiwa zimesuasua.

mkuu wa mkoa wa mbeya Amos Makalla

Alisema Halmashauri ya wilaya ya Mbarali imetekeleza kwa asilimia 85,Kyela asilimia 84,Mbeya vijijini asilimia 81,Busokelo asilimia 73,Chunya asilimia 42 na Rungwe ni ya mwisho ambapo imetekeleza kwa asilimia 27 pekee.

“Mpaka kesho saa nane mchana niwe nimepokea baru na siyo za wilaya ni mtu mmoja mmoja aandike.Yaani mkuu wa wilaya anaandika yak wake na mkurugenzi yak wake ujieleze ni kwa nini haujatekeleza.Wala kusiwe kusingiziana .Mlete niambatanishe na takwimu zilizopo kisha ntawasilisha keshokutwa kwa waziri mwenye dhamana”

“Wakati tunaanza kuna Halmashauri zilitafsiri kuwa ni agizo la mkuu wa mkoa.Sisi tulikuwa watu wa mwanzoni kabisa,tulizindua mara tu baada ya mkoa wa Morogoro kuzindua.Na kila wakati nimekuwa nikiwakumbusha lakini wapi.Sasa mjieleze wenyewe!”alisisitiza