CCM WAAHIDI KUTEKELEZA ILANI YA CHAMA HICHO KWA KULETA MAENDELEO

                                                                        Mbeya  

 

UONGOZI mpya wa Chama cha Mapinduzi  (CCM)  Wilayani Kyela mkoani Mbeya umejipanga kuisimamia serikali katika utekelezaji wa Ilani ya Chama hicho katika kuwatumika wananchi katika kuondoa kero sugu na kuwaletea maendeleo.

Kauli hiyo imetolewa jana na katibu wa Itikadi siasa na uenezi wilayani humo Emmanuel  Mwamulinge katika kikao cha kamati ya siasa ya wilaya ikiwa ni kikao cha kwanza baada ya kuchaguliwa ambapo walipanga mikakati mbalimbali ya kukiimarisha cham hicho na kuwatumikia wananchi.

Amesema uongozi huo mpya kwa kushirikiana na madiwani,Mbunge na mkuu wa wilaya utahakikisha unasimamia huduma za jamii zinazotekelezwa kwa wakati ikiwa ni pamoja na kuhakikisha wanaondoka kero ya muda  mrefu ya ukosefu wa dirisha maalum kwa wazee na watoto wanaotakiwa kutibiwa bure.

Aidha amelisema chama cha mapinduzi wilayani humo kwa sasa kimejipanga kuhakikisha migogoro ndani ya chama hicho haipati nafasi kwani wao kazi kubwa waliyonayo ni kuhakikisha  wanashikamana kusimamia ilani na sio kutumia muda mwingi kusuluhisha migogoro isiyokuwa na tija.

Pia ameongeza kuwa wanaweka utaratibu wa kukutana  na wale ambao waligombea nafasi mbalimbali katika chama hicho na kura zao hazikutosha kuwapa ushindi kushirikiana  nao katika mambo yanayohusu chama hicho.

Awali chama cha mapinduzi wilayani kyela kilikumbwa na migogoro iliyopelekea baadhi ya madiwani kususia vikao vya baraza wakimtuhumu mwenyekiti wa halmashauri hiyo Dk Hunter Mwakifuna kuwatetea baadhi ya watendaji waliokuwa na tuhuma za ubadhilifu wa fedha za umma.

Mgogoro huo uliuodumu kwa zaidi ya miezi 13 ulipelekea makamu mwenyekiti wa CCM taifa na Mwenyekiti wa kamati ya maadili wa chama hicho Phillipo Mangula kufika wilayani humo kutatua mgogoro ambao hata hivyo ulishindikana na hivyo mgogoro huo kumalizwa na waziri mkuu Kassim Majaliwa.