WAZIRI MKUU KASSIM MAJALIWA, AMETOA MAELEKEZO YA NAMNA YA KUMALIZA MGOGORO WA ARDHI ULIODUMU KWA ZAIDI YA MIAKA SITA, KATI YA UONGOZI WA KIWANDA CHA SARUJI MBEYA NA WANANCHI WA KIJIJI CHA NANYALA, WILAYANI MBOZI MKOANI SONGWE.

 MBOZI-SONGWE

Mgogoro huo, umetokana na Kiwanda cha Saruji Mbeya, kupewa  eneo la kijiji hicho chenye ekari 2,315 na uongozi wa mkoa wa Mbeya bila ya makubaliano na wanakijiji hali iliyosababisha wagome kuondoka.

 Waziri Mkuu amewaagiza wakuu wa Mikoa ya Songwe Luteni Mstaafu Chiku Gallawa  na   Mbeya   amos Makalla kukutana na kufanya mazungumzo ya kulirudisha eneo hilo mkoa wa Songwe.

Waziri Mkuu ametoa uamuzi huo leo  Jumatatu,   baada ya wananchi wa kijiji hicho kuzuia msafara wake kwa lengo la kumuelezea changamoto yao ya kudhulumiwa ardhi yao na kukabidhiwa kwa muwekezaji bila ya kushirikishwa.

Aidha majaliwa Amesema Serikali ya awamu ya tano chini ya  Rais Dkt. John Magufuli ni sikivu na inawajali wanyonge ndio maana amesimama ili aweze kusikiliza kero zao na kuzipatia ufumbuzi, hivyo amewaomba  waendelee kuiamini na watarudishiwa ardhi yao.

 Majaliwa  ameiagiza Kampuni ya Saruji Mbeya kuondoa kesi iliyoifungua mahakamani dhidi ya wananchi wa eneo hilo, ili waweze kukutana na Serikali pamoja na wananchi hao kwa ajili ya kujadili namna bora ya uwekezaji katika eneo hill.

Amesema kiwanda hicho kilipewa eneo hilo la mkoa wa Songwe kimakosa na mkoa wa Mbeya kwa ajili ya kupata malighafi ya kutengenezea saruji hivyo  Serikali haiwazuii kulitumia eneo hilo ila wakubaliane na wananchi kwanza.

Kwa upande wake, Mkuu wa Mkoa wa Songwe amemshukuru Waziri Mkuu kwa kulitolea tamko  suala hilo na kwamba atakutaka na Mkuu wa Mkoa wa Mbeya kwa ajili ya utekelezaji wa agizo hilo ili wananchi waweze kuishi kwa amani katika ardhi yao.