MKUU WA MKOA WA MBEYA ATANGAZA VITA NA KIKUNDI CHA WATU WANAO JIITA WAKOREA WEUSI

MBEYA 

SERIKALI mkoani Mbeya imetangaza vita dhidi ya kundi la vijana wanaojiita Wakorea weusi ambao wamekuwa tishio jijini hapa kwa kuwapiga nondo watu na kasha kuwapora na kuwafanyia vitendo vya ulawiti na ubakaji.

Kikundi cha vijana wanaojiita wakorea weusi kinachotajwa kuwa na matawi mbalimbali kimekuwa tishio katika maeneo mbalimbali jijini hapa na kusababisha watu kuishi kwa hofu kubwa.

Mkuu wa mkoa wa Mbeya Amos Makalla ametangaza vita dhidi ya vijana hao jana na akisema sasa Polisi wanaingia mtaani kuwasaka na ole wake atakayekamatwa.

“Sina lugha nzuri ya kuwaambia.Ole wao!Nataka RPC kuanzia usiku wa leo hao watu wajue siyo salama kwao.Hatuwezi kukubali,tutawasaka kila kona na tutahakikisha tunamaliza mpaka kiini”

“Mimi kama mwenyekiti wa Kamati ya ulinzi na usalama ya mkoa hatuwezi kukubali watu wachache wavuruge amani ya mkoa.Watafute kazi nyingine.Hata kama mko hapa nawaambieni kuanzia usiku wa leo hamko salama.Tunataka mkoa wetu uwe salama watu wetu wafanye shughuli zao za kimaendeleo katika hali ya amani na utulivu”alisisitiza Makalla alipokuwa akizungumza na wakazi wa Kata za Isyesye na Itezi jijini hapa.

Mkuu huyo wa mkoa pia aliwataka wananchi kutoa ushirikiano kwa jeshi la polisi akisema kwa vyovyote watu wanojihusisha na uhalifu huo wanaishi ndani ya jamii hivyo polisi wanaweza kukabiliana nao kwa dhati kutokana na ushiriki wa wana jamii.

Kwa upande wao Machifu wa kabila la Wasafwa kupitia kwa Chifu Ally Nyenze walisema vitendo vya upigaji nondo vinavyofanywa na kundi la wakorea weusi vimekuwa tishio kubwa hususani katika maeneo ya Isyesye,Itezi,Ilomba,Mama John na Soweto.

Naye Diwani wa kata ya Isyesye,Ibrahim Mwampwani alisema ni siku tatu tu zimepita tangu mwalimu mmoja apigwe nondo na watu watatu ambapo kutokana na majeraha aliyoyapata amelazwa katika hospitali ya Rufaa kanda ya Mbeya anakoendelea kupata matibabu.

Hata hivyo diwani huyo alisema uwepo wa mimea ya mahindi katika baadhi ya maeneo unachangia wakorea weusi kujificha na kuwavizia watu wanaopita maeneo hayo.