WANUFAIKA WA TASAF WAFURAHIA KUONDOKANA NA KUWA OMBA OMBA

RUNGWE-MBEYA

BAADHI ya wananchi wilayani Rungwe mkoani Mbeya,wameishukuru serikali kupitia halmashauri ya wilaya hiyo,kwa kutoa misada kusaidia wakazi watokao kwenye kaya masikini ambazo zimefanikiwa kuanzisha miradi kwa ajili ya kujikwamua kiuchumi.

Wakazi hao kupitia misaada hiyo ya TASAF, wameweza kuanzisha miradi ya ujasiliamali ambayo inawaingizia kipato kinachowawezesha kusomesha watoto wao na kuendesha maisha yao ya kila siku na kujioona wao ni sawa na wananchi wengine.

Ernes Anyimike,mkazi wa Tukuyu,alisema yeye ni mmoja wa wanufaika wa mpango wa kaya masikini Tasaf,ameweza kuanzisha mradi wa ufugaji kuku wa kienyeji ambapo amekuwa akijipatia kipato kinachowezesha kuendesha masiaha yake na hata kusomesha watoto.

Esau Mwamita mkazi Igogwe,alisema anaipongeza serikali kwa kuanzisha mpango huo ambao kwa sasa wameweza kunufaika mara dufu licha ya kuwa baadhi ya wanufaika wamekuwa wakiendesha vibaya miradi na kutopata manufaa.

Alisema ipo haja serikali kupitia halmashauri ya wilaya hiyo kutoa elimu kwa wanufaika kutokana na baadhi yao kutofanikiwa katika kuendesha miradi hiyo,na kuwa tangu wapate misaada hiyo,wameweza kufanikisha mambo mengi ikiwemo kuondokana na kuwa ombaomba.

Nsajigwa Mkapa,mratibu wa Tasaf kata ya Kawetele alisema waliweza kuwapitia na kuwapa ushauri wanufaika wa kata yake na kuona jinsi walivyonufaika na sasa wameweza kusomesha watoto wao pamoja na kuwa na uhakika wa kupata chakula mara tatu kwa siku ukilinganisha na hapo awali.

Sambamba na hilo,amewataka wanufaika hao kutobweteka na kile wanachokipata na badara yake waongeze juhudi ya kubuni miradi ili waongeze kipato zaidi na kuwa kwa wale ambao wameshindwa kuongeza uzarishaji watapatiwa elimu ili nao waweze kuongeza kipato.