WANANCHI WILAYNI KYELA MKONI MBEYA WALALMIKIA MRADI WA MAJI KUTELEKEZWA ZAIDI YA MIAKA MINNE SASA

MBEYA

WANANCHI wa vijiji vilivyopo kata za Ipinda ,Ipande,Mwaya,Muungano Talatala na Ikama ,wameilalamikia halmashauri ya wilaya hiyo kwa kuutelekeza mradi wa maji safi na salama wa zaidi ya Bilioni 3.8 huku wakazi wa maeneo hayo wakiendelea kuhatarisha maisha yao kwa kunywa maji machafu.

Wakizungumza jana na gazeti hili baada ya kufanya ziara ya siku moja kuutembelea mradi huo kwa masaa saba,walisema tatizo la maji safi na salama Kyela ni sugu,hivyo serikali ilitoa Bilioni 3.8 kwa ajili ya kujenga mradi wa maji safi ili wakazi wa kata hizo waweze kunufaika lakini umetelekezwa na hakuna mrejesho.

Asha Kimbe mkazi wa Talatala,alisema ni ajabu kuona halmashauri imeshindwa kufuatilia waliosababisha kuukwamisha mradi huo kutokana na umuhimu wake na kwamba wanaiomba serikali kuu kuingilia kati ili kuhakikisha mradi unamalizika na kuwawajibisha walioukwamisha.

Sanke Mwaitamwa mkazi wa Ipinda alisema mradi huo ulikuwa ni muhimu sana ambapo ulianza kutelekezwa miaka minne iliyopita ambapo wao kama wananchi wameshindwa kuelewa kinachoendelea licha ya kuwa waliwauliza madiwani wao pasipo kuwapa majibu ya kutosha.

Alisema kukosekana kwa mradi huo wa maji bado maisha yao yapo hatarini kwa kuendelea kunywa maji ya mtoni ambayo hata hivyo si safi na salama hivyo kupelekea kuuguma magonjwa ya milipuko kikiwemo kipindupindi ambacho kimekuwa kikiibuka kila mwaka na kuua watu.

Akizungumza kwaniaba ya madiwani wenzake,diwani wa kata ya Talatala,Angumbwike Mwakibete alisema ni kweli mradi huo umetelekezwa tangu miaka minne iliyopita na kwamba waliwahi kukaa vikao na madiwani ambao vijiji vyao vingenufaika na mradi huo,na kusema kuwa suala hilo lilipelekwa ngazi ya wilaya ambako linashughulikiwa.

Akijibu utelekezwaji wa mradi huo,Mwenyekiti wa halmashauri ya wilaya hiyo,Dkt,Hunter Mwakifuna,alisema ni kweli fedha za ujenzi wa mradi huo wa maji safi na salama zilitoka zaidi ya Bilioni 3.8 lakini mradi uletelekezwa miaka minne iliyopita na kusema kuwa wakati huo yeye hakuwa mwenyekiti.

Alisema mradi huo ukikamilika utasaidia vijiji vya Kiingili kata ya Ipinda,Bukinga na Lutusyo kata ya Muungano,Kagogo na Ngolele kata ya Talatala,Mwambusye kata ya Ikama na Ndola,Lughombo kata ya Mwaya,na kuwa kukwama kwa mradi huo kumeongeza hadha ya upatikanaji wa maji kwa wakazi wa kata hizo.

Alisema  mradi huo ulitolewa mwaka 2014 ambapo hadi sasa ni miaka minne imepita tangu mradi utelekezwe na kwamba kwa kuwa yeye ni mwenyekiti na ni diwani kata ya Ipinda ameanza mchakato wa kulipeleka suala hilo ngazi ya mkoa ili kuhakikisha linafanyiwa kazi.