WAKULIMA MKOANI SONGWE WAMEOMBA ELIMU KUTOLEWA KWANZA KABLA YA KULIMA

 MBOZI:SONGWE

Wakulima wa kikundi cha wakulima Ichenjezya Saccos wilayani Mbozi mkoani Songwe, wameomba kupatiwa mafunzo kwanza, kabla ya kuanza kulima na kupanda katika mashamba yao ili ujuzi wanaopata wautumie kwa vitendo mashambani mwao.

Hayo yamesemwa jana katika kijiji cha Nselewa ambako wakulima hao wamekutana kwa ajili ya mafunzo katika shamba darasa ambapo wamesema licha ya kupatiwa mafunzo hayo lakini tayari sehemu kubwa wamekwishalima na kupanda kwa mbinu walizozizowea jambo ambalo halijawasaidia sana.

Sekelo Kayange amesema kuanzia mwakani ni vizuri wakulima wa kikundi hicho wakapatiwa mafunzo kwanza katika shamba darasa, kabla ya kupatiwa pembejeo ndipo waendelee kuendeleza mashamba yao ili wataalamu wanapotoa mafunzo ya namna ya kupanda kwa kutumia pembejeo za kisasa ili katika muda ule ule waweze kutumia maarifa hayo kwenye mashamba yao ili kuleta tija.

Katibu wa kikundi cha Ichenjezya Joseph  Masanja amesema wazo la kupatiwa mafunzo mapema waliliona lakini walipowasiliana na watu wa makampuni ya Mbegu walidai wasubiri mvua ziongezeke kwani kuanza kupanda katika mashamba darasa wakati mvua ni chache zinaweza zisiote vizuri kutokana na ukame lakini wakulima wakaona kama mbegu zao hazifai hazifai.

Wiki iliyopita Mkuu wa mkoa Songwe Chiku Galawa akizungumza na waandishi wa habari ofisini kwake aliagiza wataalamu wa ugani kuondoka ofisini na kuanzisha mashamba darasa katika maeneo yao ili wakulima wayatumie kupata maarifa yatakayowasaidia kuboresha kilimo chao ili kuongeza tija na kwamba hicho kitakuwa kipimo cha kila mgani.

Aidha Galawa alisema mkoa umeweka mkakati wa kuongeza uzalishaji ikiwa ni pamoja na kudhibiti uingizaji wa pembejeo feki kwa kuwatambua wasambazaji wa pembejeo kila eneo ambapo alisema mkoa unatarajia kuongeza eneo la uzalishaji la hekta 299393 katika msimu wa kilimo 2017/2018 badala ya hekta 250117 zilizolimwa mwaka jana.