KAMATI YA UCHAGUZI TFF YAKUTANA KUJADILI HATMA YA UCHAGU MKUU WA TFF

KIKAO cha dharura cha Kamati ya Utendaji ya Shirikisho la Soka la Tanzania (TFF) kinachoketi leo Jumanne jijini Dar es Salaam, kimeshikilia shingo za wajumbe wa Kamati ya Uchaguzi ya shirikisho hilo sambamba na hatima ya mchakato wa uchaguzi mkuu ambao umesimamishwa, lakini huenda jambo kubwa zaidi likatokea leo.

Wakati kikao hicho cha leo kikitajwa kuwa na lengo la kumaliza mpasuko uliojitokeza kwenye Kamati ya Uchaguzi baina ya Mwenyekiti, Wakili Revocatus Kuuli na wajumbe wake, habari ambazo gazeti hili limezipata ni kuwa huenda kikao hicho kikaivunja kamati hiyo na kutangaza mpya.

Juzi Jumapili, Wakili Kuuli aliamua kuusimamisha mchakato wa uchaguzi na kuandika barua ya kuomba usaidizi wa Kamati ya Utendaji katika kushughulikia mvutano ulioibuka kati yake na wajumbe wa kamati ya uchaguzi juu ya zoezi la usaili na utangazaji majina ya wagombea waliopitishwa na kamati hiyo.

“Mimi kama Mwenyekiti wa kamati nimechukua jukumu na dhamana ya nafasi niliyo nayo kumuandikia barua Katibu Mkuu wa TFF ikiwa dhamira yangu ni kuangalia upya mwenendo mzima wa kamati. Nashukuru na yeye wamekaa na sekretarieti wamekubaliana na maombi yangu na wameona ni sahihi mchakato huo usimame”, alisema Kuuli juzi.

Hata hivyo taarifa ambazo gazeti imezinasa ni kuwa kamati hiyo ya uchaguzi ambayo iliundwa chini ya uongozi wa Malinzi, huenda ikavunjwa leo kutokana na mgawanyiko huo ulioibuka kwa wajumbe wake unaodaiwa kwa kiasi kikubwa kuchangiwa na mgongano wa kimaslahi.

KUMBE KUNA UKANDA?

Mgombea wa nafasi ya Makamu Rais, Mtemi Ramadhani alisema: “Katika kamati ya uchaguzi wajumbe watatu wanatoka mkoa ambao Rais anayemaliza muda wake anatoka huko, lakini kama haitoshi kuna mjumbe mmoja anatoka katika kamati tendaji ya mkoa wa Kagera kwahiyo hii inahatarisha kuwa na hali ya kupendelea upande fulani, kwa hiyo maamuzi aliyoyafanya Mwenyekiti wa kamati hiyo yapo sahihi kabisa.”

Mgombea mwingine wa Makamu wa Rais, Robert Selasela alisema: “Kama Mwenyekiti anataka haki itendeke halafu wajumbe wengine wanapinga hii haipo sawa na inaonesha jinsi gani kuna mambo mengine ambayo siyo sahihi yanaendelea kati yao, ila acha tuone kamati tendaji itaamua nini.”

KATIBA INASEMAJE?

Katiba ya TFF kupitia Ibara ya 34 inatoa mamlaka kwa Kamati ya Utendaji ya shirikisho hilo kuteua, kufanya mabadiliko ama kuchukua hatua dhidi ya kamati mbalimbali zilizo chini yake ikiwemo Kamati ya Uchaguzi.

“Kamati ya Utendaji ina Mamlaka ya kuteua wakuu wa idara za TFF na kuwachukulia hatua za kinidhamu,” inasema ibara hiyo kwenye kifungu D wakati kifungu J kinasema: “Kamati ya Utendaji ina mamlaka ya kuteua na kuwachukulia hatua za kinidhamu, wajumbe wa kamati za kisheria, uchaguzi na za kudumu.”

Hata hivyo, Katibu Mkuu wa muda wa TFF, Salum Madadi, hakuweza kukanusha wa kuthibitisha tetesi za kuvunjwa kwa Kamati ya Uchaguzi na kudai kamati ya utendaji ndio itakayoamua.

“Kuhusu kipi kitafanyika kwenye kikao hicho, ni juu ya kamati, baada ya kukutana mtajua,” alisema.