MKUU WA WILAYA YA RUNGWE ATAKA WANAFUNZI WA KIKE WASIOKUWA TAYARI KUKAMATWA

Mkuu wa Wilaya ya Rungwe Julius Chalya

RUNGWE-MBEYA

MKUU wa wilaya ya Rungwe Julius Chalya ameagiza kukamatwa na kuwekwa ndani kwa wanafunzi wa kike ambao watagoma kuwataja wanaume waliohusika kuwapa ujauzito.

Alitoa agizo hilo hivi karibuni wakati akifungua kikao cha Wadau wa elimu katika halmashauri ya Wilaya hiyo cha kujadili na kuweka mikakati ya kuinua kiwango cha elimu kwa shule za Msingi na Sekondari.

Chalya alisema baadhi ya wanafunzi wa kike wamekuwa wakigoma kutaja watu waliohusika kuwapa ujauzito kwa kuhofia wanaume wao watachukuliwa hatua za kisheria.

Alisema pia wapo wazazi ambao wanashirikiana na wahusika waliwapa ujauzito watoto wao na kumalizana wao kwa wao bila kufikisha suala hilo mbele ya vyambo vya sheria hatua ambayo inapelekea ongezeko la Mimba za anafunzi.

“Mzazi wa Kike na wa Kiume wakikubaliana kumaliza suala la Mimba la mtoto wao bila kufikisha mbele ya vyombo vya sheria na mtoto wa kike atakayegoma kutaja mhusika wawekwe wote,tukikaa kimya maana yake tumekubaliana na hali hiyo,” alisema.

Hata hivyo aliwaagiza waratibu elimu katika kata zote za halmshauri ya Wilaya hiyo kuhakikisha wanasimamia mienendo ya walimu shuleni kwa kuhakikisha wanawajibika ipasavyo na kuleta mageuzi ya kitaaluma katika shule zao.

Pia aligusia suala la chakula shuleni ambapo alisisitiza kuwa wazazi na Jamii kwa ujumla inapaswa kuwajibika kwa kuchangia chakula shuleni kwa kuwa ni Muhimu katika kukuza ufaulu kwa wanafunzi.

Mkuu wa Chuo cha ualimu cha Mpuguso, Dorothy Mhaiki alikumbusha kuwa lengo la kufikia uchumi wa kati ifikapo mwaka 2025 kwa asilimia kubwa linaitegemea sekta ya elimu.

Alisema sera ya viwanda inategemea kupata wataalamu mahiri wa kusimamia na kufanya kazi kwenye viwanda hivyo watakaozilishwa kutokana na Matunda ya elimu bora.

“Jambo la kufikia uchumi wa kati utakaotokana na nchi ya Viwanda unategemea sekta ya elimu kwa kiwango kikubwa kuwa kuwa hiyo ndio yenye jukumu la kutoa wataalamu watakaotumika kwenye viwanda, hivyo jambo la elimu linahitaji uwajibikaji mkubwa,” alisema.

Afisa elimu Msingi katika Wilaya hiyo Joseph Mabeyo alikiri kuwa suala la utoro kwenye shule za Msingi na Sekondari imekuwa changamoto hivyo wadau wanapaswa kushirikiana kukabiliana na changamoto hiyo.