MKUU WA WILAYA YA KYELA AWATAKA WANAFUNZI KUTOKUFIKIRIA KUOA AU KUOLEWA

Mkuu wa Wilaya ya Kyela Bi.Claudia Kitta

KYELA-MBEYA

MKUU wa Wilaya ya Kyela Mkoani Mbeya Claudia Kita, amewataka  wanafunzi  ambao hawajachaguliwa kujiunga na Kidato cha kwanza mwaka huu kuachana na Fikra za kutaka kuoa au kuolewa  na badala yake wafikirie kujiunga na elimu ya ufundi stadi ili wajikwamue kiuchumi.

Kita ametoa rai hiyo jana wakati akizungumza na Madiwani wa halmashauri ya Wilaya ya Kyela walipokuwa kwenye kikao cha kujadili na kupitia taarifa za kamati mbalimbali katika kipindi cha robo mwaka fedha 2017/2018.

Mkuu huyo wa Wilaya alisema Jumla ya wanafunzi 2710 kati ya 7338 waliofanya mitihani ya kumaliza elimu ya msingi hawajabahatika kuchaguliwa kujiunga na Kidato cha kwanza kutokana na kufanya Vibaya.

Alisema Idadi hiyo ya wanafunzi waliosalia nyumbani ni kubwa hivyo wazazi na walezi wana wajibu wa kuhakikisha wanawapeleka kwenye shule binafsi au  shule za ufundi ili wawezi kupata ujuzi wa kufanya kazi za Mikono utakaofanya waweze kujitegemea hapo baadae.

“kwa takwimu nilizonazo wanafunzi 2710 hawajachaguliwa kujiunga na Kidato cha kwanza mwaka huu hao wapo nyumbani, nitoe rai kwa wazazi na walezi tusiwaacha tuwapeleke shule za ufundi wakajifunze kazi za mikono, pia wao waachanae na fikra za kuoa au kuolewa kwa kuwa bado wana umri mdogo,”

“Pia na nyie Madiwani mtusaidie katika hili nah ii itasaidia hata vijana wetu ambao wapo nyumbani kutojiingiza kwenye Makundi Mabaya ikiwemo Madawa ya Kulevya na uhalifu mwingine kwa kisingizio cha ukosefu wa ajira,” alisema.

Aidha, Mkuu huyo wa wa wilaya aliwataka wananchi wa wilaya hiyo kuendelea na kilimo katika msimu huu na kuwahakikishia kuwa Mbolea aina ya  UREA ipo ya kutosha isipokuwa  bei imeongezeka kidogo kutokana na gharama za manunuzi na usafirishaji.

Hata hivyo hakuweka bayana gharama ya sasa ya Mbolea hiyo kwa madai kuwa hadi kamati ya Pembejeo ya wilaya itakapoketi kupitia mchakato mzima wa usambazaji na kusisitiza kuwa inapatikana kwa bei ambayo kila mkulima anaweza kuimudu.

Kwa upande wake Mwenyekiti wa halmashauri ya Wilaya hiyo Hunter Mwakifuna aliwataka Madiwani na wananchi  kutotafsri vibaya kauli ya rais John Magufuli ya kupiga marufuku michango shuleni.

Alisema Kauli ya raisi inawapiga marufuku walimu na maafisa elimu kuwatoza michango wazazi na walezi na kwamba wananchi wanaweza kuamua kuchangia michango mbalimbali ikiwemo chakula kwa kibali kutoka kwa mkurugenzi wa halmashauri.