SERIKALI MKOANI MBEYA YASEMA HAITAWALIPA FIDIA WALE WOTE WATAKAOPISHA MRADI WA MAJI WILAYA YA CHUNYA

CHUNYA- MBEYA

Serikali imesema haitalipa fidia kwa mwananchi yeyote atakayezuia utekelezaji wa miradi ya maji katika Wilaya Chunya Mkoani Mbeya.

Mkuu wa Wilaya ya Chunya Rehema Madusa ametoa agizo hilo alipokuwa akikabidhi kwa Mkandarasi mradi wa maji Kitongoji cha Nyatula Kata ya Kiwanja ambapo baadhi wananchi walitaka fidia katika maeneo yatakayopitiwa na mradi huo.

Akijibu hoja ya wananchi wa Kiwanja Mhandisi wa Maji Wilaya ya Chunya Athanas Msangule amesema Serikali kupitia wataalamu wake itatoa vipimo kwa eneo husika la mradi kwa mujibu wa sheria.

Kwa upande wake Mkurugenzi Mtendaji wa Halmashauri ya Wilaya Chunya Sophia Kumbuli amesema wananchi wanapaswa kuchukua tahadhari mapema ili kutopata hasara na kupisha vyanzo vya maji licha ya kwamba inawezekana ikawa siyo ndani ya mita 60.

Mkuu wa Wilaya ya chunya Rehema Madusa amesema msisitizo wa agizo la wananchi kutozuia au kukwamisha miradi ya maji kwani ina manufaa kwa wengi na kwamba atakayebainika kuzuia au kukaidi maagizo kutoka serikalini na kufanya hujuma ya aina yoyote ile hatua kali za kisheria zitachukuliwa dhidi yake.

Mradi mpya wa maji wa Nyatula utazilisha lita za ujazo laki tisa na sitini hivyo kuongeza kiwango cha uzalishaji wa lita laki nne na kufikia lita milioni moja laki tatu na sitini hivyo kuwezesha mji wa Chunya kupata maji kwa asilimia sabini na kupunguza adha  ya   upatikanaji wa maji katika mji huo.