OPERESHENI YA KUWAKAMATA WANAOJIHUSISHA KIMAPENZI NA WANAFUNZI YAANZISHWA MAKETE WAHUSIKA KUBURUZWA MAHAKAMANI

 

NJOMBE-MAKETE

Halmashauri ya wilaya ya Makete imetangaza kiama kwa wazazi/walezi wa wanafunzi watoro pamoja na wanaume waliowapa mimba wanafunzi na wale wenye mahusiano ya kimapenzi na wanafunzi.Pia imesema msako huo utawapeleka wahusika mahakamani na operesheni hiyo itaendeshwa wilaya nzima

Katika taarifa iliyotolewa na  mwanasheria wa wilaya ya Makete Godfrey Gogadi  kupitia kwa mkurugenzi  mtendaji wa halmashauri hiyo ilisema kuwa kuanzia tarehe 28/10/2017 itafanyika operesheni wilaya nzima ya kukamata na kuwafikisha mahakamani wazazi au walezi wote wenye wanafunzi watoro na watu wote wanaojihusisha kimapenzi na wafunzi.

‘’hivyo basi wazazi au walezi wote wanatakiwa kuhakikisha kuwa watoto au mtoto wako yupo shuleni kuanzia tarehe 23/10/2017’’ilisema taarifa hivyo nakuongeza’’kila mzazi au mlezi mwenye mwanafunzi mtoro au an amimba afike shuleni Tarehe 23/10/2017 akiwa na mtoto wake na kuonana na mkuu wa shule kwaajili ya kuripoti na kupata maelekezo’’

Aidha kupitia taarifa hivyo imeelezwa kuwa wazazi  ambao watakuwa hawajaripoti shuleni wakiwa na watoto wao amabo wameathirika na utoro au mimba watachukuliwa hatua kali za kisheria ikiwemo kufikishwa mahakamani na watatafutwa popote pale  atakapokuwepo nchini au nje ya nchi.

‘’wananchi na wazazi mnakumbushwa kuwa ni wajibu nwenu kisheria kuhakikisha wanafunzi wanafika shuleni  bila kukosa na hawapati mimba wakiwa shuleni au nyumbani na kufuatilia maendeleo ya kila siku’’ilisema sehemu nyingine ya taarifa hiyo.

Katika hatua nyingine wakuu wa shule,walimu wakuu na walimu wote  wametakiwa kuandaa taarifa ya wanafunzi watoro na wenye mimba na kuifikisha taarifa hiyo kwa viongozi wa vijiji na kata.

Pia wameagizwa kuhakikisha majina ya watu  wanaojihusisha kimapenzi na wanafunzi yanakuwepo kwenye ofisi za kata na kufikishwa vituo vya polisi wilayani humo.

Takwimu zinaonyesha kuwa hadi kufikia mwezi August mwaka 2017 mkoa wa Njombe ulikuwa na jumla ya wanafunzi 62 wenye mimba katika shule  za msingi na sekondari huku kati ya hao wanafunzi 53 ni wa sekondari na wanafunzi 9 ni wa shule za msingi.