MADUKA 200 YAPIGWA KUFULI KWA KUKOSA EFD MKOANI RUKWA

 

RUKWA

Meneja wa TRA Mkoa wa Rukwa, Fredrick Kanyiriri, alisema jana kuwa, maduka hayo yamefungwa baada ya kukaidi kutekeleza agizo la kuwa na mashine hizo ndani ya wiki mbili.

“Tuliwapa muda wa kutosha wanunue mashine hizo, lakini wengi wao hawajafanya hivyo kwa hiyo TRA kwa kushirikiana na madalali waliopewa kazi hiyo, tumefunga biashara zao hadi hapo watakaponunua EFD na kulipa faini kwa kutokutii sheria,” alisema.

Kanyiriri alisema sheria inawataka wafanyabiashara ambao makusanyo yao kwa mwaka yanafika Sh. milioni 14, kuwa na EFD ambazo zinapaswa kutumika kwa ajili ya kutolea risiti pindi wanapofanya mauzo ya bidhaa zao.

Mashine moja ya kielektroniki huuzwa kati ya Sh. 600,000 na 800,000 gharama ambayo, pia inalalamikiwa na baadhi ya wafanyabiashara kwamba ni kubwa kulinganisha na kipato chao.

Mmoja wa wafanyabiashara ambaye ameathirika na sakata hilo, Tumbwene Kilale, alisema kutokana na biashara kuwa ngumu kwa sasa, walipaswa kupewa muda zaidi kwa ajili ya kujipanga, ili wanunue mashine hizo.

Aidha, wakati mchakato huo ukiendelea. baadhi ya wafanyabiashara wamelazimika kufunga wenyewe maduka yao na kukimbia kwenda kusikojulikana.

Hata hivyo, Meneja Msaidizi Idara ya Ukaguzi wa TRA Mkoa, Amina Shamdas, alisema kukimbia huko hakuwezi kuwa msaada kwao kwa kuwa sheria iko wazi watafungiwa biashara zao na kutakiwa kuripoti ofisi za TRA na kulipa faini ya kati Sh. milioni tatu na milioni 4.5.

Kwa mujibu wa maofisa wa TRA, mkoa una wafanyabiashara 308 ambao wanapaswa kutumia mashine hizo, lakini ni wafanyabiashara 108 tu wanaotumia kitu ambacho kinafanya serikali kukosa mapato.