CDF YADHAMIRIA HAYA KWA JESHI LA POLISI

 

DAR ES SALAAM

KAMISHNA msaidizi wa Polisi (SACP) ambae pia ni Mkuu wa idara ya Rasilimali watu Jeshi la Polisi Makao Makuu Benedict Wakulyamba, amewataka maofisa wa Jeshi la Polisi waliopata mafunzo ya ushauri Nasihi kufanya kazi kwa uadilifu ili kuweza kuisaidia jamii kutokana na changamoto zinazowakabili.

Akizungumza na maofisa hao mapema leo hii,Jijini Dar es Salaam  alipokua akifunga mafunzo ya siku tano yaliodhaminiwa na Shirika la utu wa mtoto (CDF), ambayo yamelenga kupambana na ukatili wa kijinsia hususani upande wa wanawake na watoto amesema endapo watayatumia vizuri mafunzo hayo basi watafanikiwa kwa kiwango kikubwa.

"Nyinyi mmeaminiwa kuenda kujua matatizo ya watu,Changamoto za watu ndani ya jamii kutokana na nyazifa zenu na maadili ya kazi yenu hivyo ni vyema mukaenda kutenda kazi zenu kwa uadilifu mkubwa ili kuleta mabadiliko juu ya suala hili, kwani changamoto hizi hazipo katika jeshi la polisi tyu hata uraiani zipo "amesema kamishna Wakulyamba.

Aidha ameongeza kuwa,licha ya kuwa baadhi ya mikoa hawakufika katika mafunzo hayo, lakini watahakikisha kila Wilaya anakuepo mtu wa kuweza kutoa ushauri Nasihi na ikibidi kila kituo awepo ili kuweza kukabiliana na changamoto za ukatili wa kijinsia.

Kwa upande wake,Meneja Mipango wa Shirika hilo, Dorothy Ernest amesema kuwa Tatizo la ukatili wa kijinsia lipo kwa kiwango kikubwa hususani upande wa wanawake na watoto ndio maana wakaamua kudhamini mafunzo hayo na kufanya kazi kwa karibu na Jeshi la Polisi ili  kuweza kuwapatia msaada wahanga wa tatizo hilo.

"Tumeamua kufanya kazi na Jeshi la Polisi kwa karibu zaidi kutokana na kupokea wahanga wengi wa tatizo hili, na tunakuwa tunawaelekeza kwenu ili muweze kuwapa msaada, sasa kama hujapata mafunzo haya inakuwa ni ngumu kuweza kumpa msaada"amesema Dorothy.

Aidha amesema, mafunzo hayo yamelenga kuimarisha  madawati ya kijinsia nchi nzima na kuziba mapengo yote, na kusisistiza kuwa wataendelea kufanya kazi kwa karibu na Jeshi la Polisi ili kuhakisha wanapunguza tatizo hilo kwa kiwango kikubwa .