HALMASHAURI YA WILAYA YA SONGWE MKOANI SONGWE,IMETENGA ASILIMIA 80 YA FEDHA ZA MAKUSANYO YA MAPATO

 

SONGWE-SONGWE

HALMASHAURI ya wilaya ya Songwe mkoani Songwe,imetenga asilimia 80 ya fedha za makusanyo ya mapato yatokanayo na ushuru wa pombe za kienyeji kwa ajili ya kuwalipa posho wenyeviti wa vijiji katika kata ya Ifwenkenya.

Kata ya Ifwenkenya inavyanzo vingi vya mapato ikiwemo chanzo cha pombe za kienyeji ambazo upikwa kwa wingi wakitumia mahindi na mtama zikiwa na wateja wengi wa ndani na nje ambapo halmashauri iliona asilimia 80 ya mapato yaende kwa wenyeviti hao kama motisha, ili kuwapa moyo wa kufanya kazi.

Hatua hiyo imekuja baada ya kuibuka malalamiko kwa wenyeviti hao wakidai kutolipwa posho zao kwa miezi zaidi ya mitano na kulazimika kupeleka malalamiko yao kwa mkuu wa wilaya ya Songwe ambapo nakala waliipeleka kwa mwenyekiti wa halmashauri wakitaka kujua sababu za kutolipwa,

Akizungumza jana kwenye mkutano wa hadhara,ulioitishwa na mkuu wa wilaya hiyo kwa lengo la kusikiliza matatizo yanayowakumba wananchi ikiwemo la wenyeviti kutopata stahiki zao kinyume na makubariano waliojiwekea,kwanyakati tofauti,walitoa kilio chao mbele ya mkutano huo.

Sarafina Njogoye mmoja wa wenyeviti katika kata ya Ifwenkenya,alisema kwa muda mrefu kulikuwepo na malalamiko kuhusu wenyeviti kutopatiwa posho licha ya kuwa wanafanya kazi kubwa hasa ya kukusanya mapato lakini wanaolipwa mishahara ni maafisa watendaji pekee.

Alisema baada ya kuwepo kwa malalamiko hayo serikali iliamua kupitia vyanzo vyote vya mapato kwenye kata hiyo,ambapo waliamua asilimia 80 ya mapato ya pombe za kienyeji ziwe zinatumika kulipa posho wenyeviti na asilimia 20 iwe inaingia serikalini lakini kwa muda wa miezi 5 hawajalipwa.

Mwenyekiti wa halmashauri hiyo, Abraham Sambila alisema kutokana na kazi kubwa wanaoifanya wenyeviti wa vitongoji na vijiji katika kata hiyo,halmashauri iliamua chanzo kimoja cha pombe za kienyeji mapato yake yatumike kulipa posho wenyeviti ambapo alimuinua afisa mtendaji wa kata kutoa sababu.

Akijibu sababu hizo,afisa mtendaji wa kata ya Ifwenkenja Visenti Mpanzu,alisema tatizo la wenyeviti hao kutolipwa posho imetokana na kutofikia lengo la makusanyo ambapo walikubariana wasaidiane kukusanya fedha hizo na kuwapa nafasi ya kusimamia makusanyo ambapo hawakufikia lengo.

Kutokana na majibu hayo,Mwenyekiti Sambila,alisema hataki kusikia wenyeviti wa vijiji wanahusishwa kukusanya fedha,na kudai kuwa wamewaajiri maafisa watendaji kukusanya na kusimamia shughuri zote katika kata zao ikiwemo ya ukusanyaji wa mapato.

Sambila alimueleza afisa huyo mtendaji wa kata kuwa akiendelea na tabia hiyo,ajiandae kushushwa cheo kuwa afisa mtendaji wa kijiji,na kwamba kutokana na kazi wanazofanya wenyeviti wa vijiji ni lazima waheshimiwe.