KOCHA WA TAIFA STARS SALUMU MAYANGA ASISITIZA USHINDI DHIDI YA ZAMBIA SIKU YA NUSU FAINALI 5.7.2017

Dar es Salaam.
Baada ya Taifa Stars kutinga nusu fainali ya mashindano ya Cosafa kocha Salum Mayanga amesema ushindi  walioupata kwenye mchezo wa robo fainali  utakuwa chachu ya kuendelea kufanya vizuri.

Taifa Stars iliweka rekodi  kwa mara ya kwanza  kutinga hatua hiyo kwa  kuwafunga mabingwa  watetezi na wenyeji wa mashindano hayo  Afrika Kusini ‘Bafana Bafana’ kwa bao 1-0 lilifungwa na Elius Maguli.

Katika hatua ya nusu fainali Julai 5, Taifa Stars  itachuana na Zambia huku Lesotho itaivaa Zimbabwe.

“Matokeo tuliyoyapata yamekiongezea nguvu kikosi ambacho kimsingi  kilicheza vizuri zaidi ukilinganisha na  ile michezo ya makundi.

“Tumekuwa tukibadilika kutokana na mchezo husika kwa kiasi kikubwa tumefanikiwa kwenye hilo.” alisema Mayanga.

Akizungumzia mbinu atakazotumia kwenye mchezo wa nusu fainali dhidi ya Zambia kocha huyo wa zamani  Mtibwa Sugar  alisema hazitabadilika sana.

“Tulipata nafasi ya kuwaona Zambia kwenye  mchezo wao walioshinda 2-1 dhidi ya Botswana, kwahiyo tayari najua nini natakiwa kufanya.

“Sintokuwa na mabadiliko makubwa ya kiufundi kwenye mchezo huo ila nafurahishwa kuona Banda tutakuwa naye maana alikosa mchezo uliopita kwa sababu alikuwa anatumikia adhabu,”  alisema Mayanga.