POLEPOLE AWATAKA WANACHAMA WA CCM MBEYA KUACHA UKABILA

MBEYA

KATIBU wa Nec,Siasa,Itikadi na uenezi wa Chama Cha Mapinduzi(CCM) Taifa,Humphray Polepole amewataka wanachama wa chama hicho Mbeya mjini kuachana na makundi ya ukabila yanayowasababishi kushindwa katika chaguzi mbalimbali.

Polepole alitoa agizo hilo jana(Machi 1) kwenye kikao chake na viongozi wa CCM ngazi ya Tawi na kata za Mbeya mjini kilichofanyika kwenye Ukumbi wa Mkapa jijini hapa.

Alisema makundi ya kikabila ambayo yamekuwa yakiendekezwa wakati wa uchaguzi ndiyo unaotoa mwanya kwa upinzani kuchukua ushindi na kuwaacha wakivutana.

“Kuanzia leo makundi yenu ya ukabila sijui mwaka huu msafwa,mwaka huu Mnyakyusya achaneni nayo.Ndiyo yanasababisha mnawapa uongozi watu wasioeleweka.Mnanyanga’anya nyama kwa ukabila mpaka mnasahau kuwa mmekwisha idondosha chini halafu mtu anakuja kuiokota na kuondoka nao”

“Ukabili utoshe kukutambulisha asili yako wewe ulikotoka lakini siyo kwenye kuongoza umma.Unapokuwa mtanzani na usa sifa za kuongoza una haki ya kugombea popote na si kuangalia kabila lako nani.Sisi sote tunaongea Kiswahili na tunaelewana basi itoshe” alisisitiza.

Aliwataka kuwa na umoja utakaowezesha pia wananchi kutambua chama sahihi cha kukipa madaraka ili kiwaongoze na si kuchagua mtu ili ajaze nafasi na hadi muda wake wa uongozi unamalizika hakuna chochote alichowafanyia.

Aliwataka pia wanaccm kuhakikisha wanafuatilia utekelezaji wa Ilani ya uchaguzi na kuwaambia wananchi juu ya miradi inayotekelezwa na Serikali badala ya kuwaachia wapinzani kudandia na kudai wao ndiyo wanaotekeleza.

“Sisi wanaccm ndiyo tunapaswa kuwaambia wananchi nini Kiasi gani cha fedha kinatarajiwa kuletwa na serikali,Miradi gani itatekelezwa na tukitekeleza tukawaambie tumetekeleza na wao watwambie wanataka nini kingine tufanye.”

“Tusiwaachie wadandiaji wale.Maana ni wataalamu wa kudandia.Serikali ikifanya kitu wao wanasema wamefanya,hata hapa tumependeza na sare zetu wanaweza wakasema wao ndiyo walioziagiza.Sasa tusiwaache wawapotoshe wananchi.Tuwaambie ukweli.” Alisema.