WANANCHI WILAYANI RUNGWE MKOANI MBEYA WAMEFANYA MAANDAMANO YA AMANI KUIOMBA SERIKALI KUKAMILISHA MRADI WA MAJI

Rungwe

Wananchi wa Kijiji cha Isyonje Kata ya Isongole Wilayani Rungwe Mkoani Mbeya wameiomba Serikali kukamilisha mradi wa maji uliokwama kwa zaidi ya miaka mitatu wenye thamani ya zaidi ya shilingi milioni mia tatu.

Wananchi hao wamesema hayo baada ya kufanya maandamano ya amani wakiandika mabango mpaka kwenye ofisi za kijiji hicho ya kutaka kukamilika kwa mradi huo ambao umedumu kwa mda mrefu.

Aidha wananchi hao wamesema wanawake wamekuwa wakitumia mda mwingi kufuata maji umbali mrefu ili kukidhi mahitaji  ya kifamilia na ambapo wamedai kukamilika kwa mradi huo  kutawasaidia kuepuka na magonjwa ya mlipuko.

Mwenyekiti wa kijiji hicho Asajile Kamamba amesema yupo sambamba na wananchi kuhitaji kukamilika kwa mradi huo ambao ulianza kutekelezwa mwaka 2014 mpaka sasa bado haujakamilika.

Muhandisi wa maji wilayani hapo Bahati Haule amesema kufikia Disemba mwezi huu mkandarasi asipofika eneo la kazi hawatakuwa tayari kuendelea kufanya kazi na mkandarasi huyo .