HALMASHAURI YA MBEYA KUENDELEZA OPARESHENI YA KUKAMATA MIFUGO

MBEYA

HALMASHAURI ya Jiji la Mbeya imesema oparesheni ya kukamata mifugo inayozurura hovyo mjini na ufyekaji wa mahindi yaliyopandwa kwenye maeneo yaliyozuiliwa ni endelevu.

Kaimu Mkurugenzi wa Halmashauri ya jiji la Mbeya,Patrick Mwakilili alibainisha hayo kwenye mkutano wa hadhara wa mkuu wa mkoa wa Mbeya Amos Makalla uliofanyika katika kata ya Isyesye jijini hapa.

Mwakilili alisema ukamataji wa mifugo na kufyeka mahindi haufanyiki kwa maamuzi ya uongozi wa kata ya Isyesye na Itezi kama inavyotajwa na baadhi ya watu bali ni utekelezaji wa sehemu ya Sheria ndogondogo zilizotungwa na halmashauri ya jiji.

“Wanaoamua kukamata mifugo siyo diwani wala afisa mtendaji wa kata.Sheria zinasema hivyo na tutaendelea kusimamia hili.Sawa tu na kulima mahindi hapa jijini,hatujafyeka kwa kumwonea mtu kama kuna maeneo mnaona bado yapo mahindi ni kutokana tu na ratiba za kazi lakini sharia ni msumeno lazima kote oparesheni ifanyike.Hivyo ni vyema mkajua kuwa zoezi hili ni endelevu”alisisitiza Mwakilili.

Awali Diwani wa kata ya Isyesye Ibrahim Mwampwani alilalamikia hatua ya wafugaji katika kata yake kukosa usikivu akisema ni mara kadhaa wamewaonya kwa kukutana nao,kuwaandikia baru na kuwatoza faini mbalimbali lakini bado wanaacha mifugo yao inazurura.

Mwampwani alisema kutokana na uzururaji wa mifugo kumekuwa na kazi kubwa ya kutunza miti inayopandwa kwakuwa inaliwa hatua inayowakatisha tama wananchi walio na mapendi mema na utunzaji wa mazingira.

Alisema wapo wakazi wengi walionuia kupanda miti kutokana na eneo kubwa la kata ya Isyesye kuwa wazi huku kukiwa na upepo mkali lakini hofu yao kubwa ni namna ya kuilinda isiliwe na mifugo.

Kwa upande wa oparesheni ya kufyeka mahindi,Diwani huyo alisema zao hilo limekuwa kichocheo kikubwa cha matukio ya uhalifu ikiwemo wizi kwakuwa wezi hupata mwanya wa kujificha.