WANAFUNZI 465 WILAYANI MBARALI MKOANI MBEYA BADO HAWAJA RIPOTI MASHULENI

Mkuu wa Wilaya ya Mbarali Mhe. Reuben Mfune (wa kwanza mkono wa kulia)  akiwasili eneo la Mkutano pamoja na Mkuu wa Mkoa wa Mbeya Mhe. Amos Makalla (aliyevaa miwani)

MBARALI-MBEYA

WANAFUNZI 465 hawajaripoti katika Shule walizopangiwa kuanza kidato cha kwanza mwaka huu wilayani Mbarali mkoani Mbeya kutokana na sababu zisizojulikana.

Mkuu wa wilaya ya Mbarali,Reuben Mfune alibainisha hayo kwenye Kikao cha Baraza maalumu la kupitisha mapendekezo ya Bajeti ya mwaka wa fedha ujao.

Mfune aliagiza hatua za Kisheria kwa wazazi wote ambao watoto wao hawajaripoti katika shule walizopangiwa ili kuwezesha waoto wote kuanza masomo.

Alisema wanafunzi waliochaguliwa walikuwa 3,025 kati yao wakiwemo wavulana 1,524 na wasichana 1,501 na hadi sasa walioripoti ni 2,308 wakati waliobadili shule ni wanafunzi 100 na wengine 152 wamekwenda katika shule binafsi.

“Maafisa watendaji wa kata kuanzia leo sitaki mbaki kusubiri amri nyingine.Kahakikisheni wazazi ambao watoto hawajaripoti mashuleni mnawachukulia hatua stahiki.Wafikisheni mahakamani haraka iwezekanavyo.Hatutaki kulea kizazi cha watu wasio na elimu”

“Tulikwisha sema kwakuwa elimu ni bure hakuna kisingizio kingine.Na kama bado sare hazijanunuliwa tumeruhusu mtoto aje na nguo tu za nyumbani aanze masomo wakati mzazi anaendelea kumtafutia sare.Muhimu tu awe na daftari.”alisisitiza Mfune.

Kwa upande wake Mwenyekiti wa Halmashauri ya wilaya ya Mbarali,Francis Mtega aliwataka madiwani kushiriki katika kampeni ya kuhakikisha wanafunzi wote wanaripoti katika shule walizopangiwa badala ya kuingiza siasa na kukwamisha.