ASLIMIA 28 YA WANANFUNZI WANAOMALIZA DARASA LA SABA HAWAWEZI KUFANYA MAJARIBIO YA KUSOMA NA KUFANYA HESABU ZA DARASA LA PILI

TUNDUMA -MOMBA- SONGWE 

Utafiti uliofanywa na taasisi ya Uwezo iliyopo chini ya Twaweza unaonesha asilimia 28 ya wanafunzi wanaomaliza darasa la saba hawawezi kufanya majaribio ya kusoma na kufanya hesabu za kiwango cha darasa la pili, huku asilimia 48 wanamaliza elimu ya msingi wakiwa hawajui lugha ya kingereza.

Hayo yameelezwa mwishoni mwa wiki na mratibu wa Uwezo mkoa wa Mbeya Furaha Christopher alipokuwa akizungumza wakati wa uzinduzi wa ripoti ya halmashauri ya Tunduma wilayani Momba mkoani Songwe, kuhusu utafiti uliofanywa na taasisi yake kwa kusaidiana na shirika la (ADP)Mbozi kuwa  takribani watoto 6 kati ya 10 wa darasa la tatu sawa na asilimia (56) waliweza kusoma hadithi ya Kiswahili ya darasa la pili.

Alisema Kwa darasa la saba, watoto 9 kati ya 10 sawa na asilimia 89, waliweza kusoma hadithi ya Kiswahili ya darasa la pili, hali ambayo inamaanisha takribani asilimia 11 ya watoto wanamaliza darasa la saba bila kujua kusoma na kuandika.

Christopher alisema  mtoto 1 tu kati ya 10 sawa na 13 wa darasa la tatu alioweza kusoma hadithi ya Kiingereza ya darasa la pili, kwa darasa la saba, ni takribani watoto 5 kati ya 10 sawa na asilimia 48 waliweza kusoma hadithi ya Kiingereza ya darasa la pili idadi ambayo ni karibu nusu ya wanafunzi wa darasa saba wanamaliza shule bila kuwa na maarifa muhimu ya lugha ya Kiingereza ambayo ni lugha ya kufundishia sekondari.

Aidha alisema utafiti huo ulifanyika mwaka 2015 na kuhusisha wilaya zote 159 Tanzania bara, (vitongoji) 30 kwa kila wilaya, (jumla 4,770), Kaya 20 kwenye kila kijiji au Mtaa, hivyo ni kaya 600 kila wilaya na mbinu iliyotumika ni kuwahoji wanafunzi wenye kati ya umri wa miaka 7 na 16 kwa kuwapa majaribio ya darasa la pili ya hesabu, kusoma Kiswahili na kingereza.

Mgeni rasmi katika hafla hiyo ambaye pia ni mwalimu mkuu wa shule ya msingi Majengo Kulthum Njalambaha alisema zipo sababu nyingi zinazoathiri watoto kujifunza shuleni ikiwa ni pamoja na mrundikano wa watoto darasani ambao unaathiri mwalimu kuwafikia wote ili kuhakikisha kama wameelewa wanachofundishwa.

Alisema sababu nyingine ni ushirikiano hafifu kati ya walimu na wazazi ambapo baadhi ya watoto ni watoro wasiohudhuria vipindi vyote darasani kwa visingizio mbalimbali kama kukosa mahitaji muhimu kama daftari na kalamu, na kukosa chakula cha mchana.

Njalambaha aliitaka jamii kuendelea kujenga vyumba vya madarasa ili kupunguza mlundikano wa wanafunzi darasani ili uwepo uwiano unaostahili wa watoto 45 kwa mwalimu mmoja badala ya uwiano uliopo sasa kwa shule nyingi wa zaidi ya watoto 100 ambao walimu wanashindwa kuwafikia wote.

Mmoja wa wanafunzi wa darasa la tano katika shule ya msingi Majengo Gollani Ansa  alisema serikali iwasaidie kuwapatia walimu wa masomo ya hesabu na kingereza kwani waliopo ni wachache na mkazo ni mdogo.

Bensoni Mlowezi ni mzazi  ambaye alisema ili kuongeza ufaulu wa watoto wao lazima mahusiano ya karibu kati ya wadau hao watatu, mwalimu mzazi na mwanafunzi ikiwa ni pamoja na kuboresha miundombinu, kuanza kutoa chakula cha mchana kwa wanafunzi.

Afisa mtendaji wa mtaa wa Half Londoni Maua Isaya alisema wakazi wa Tunduma wamejiingiza zaidi kwenye masuala ya biashara huku wakisahau masuala ya elimu kwa watoto wao, ambapo wakati Fulani wakiitwa na ofisi yake au mwalimu shuleni wamekuwa wakituma vijana wa kazi za nyumbani watu ambao ni vigumu kutoa mamuzi.

Mkuu wa mkoa wa Songwe Chiku Galawa tayari ameagiza shule zote mkoani hapa kuanza kutoa chakula cha mchana kwa wanafunzi ikiwa ni njia ya kupunguza utoro unaotokana na njaa na kuongeza ufaulu kwa kuziagiza halmashauri zote zihakikishe wazazi wanachangia chakula kwa watoto wao.

Aidha jitihada hizo pia za ujenzi wa vyumba vya madarasa zinaendelea kufanyika ili kupunguza mlundikano wa watoto madarasani, mkoa wa Songwe katika matokeo ya darasa la saba ya mwaka huu imekuwa miongoni mwa mikoa 10 iliyofanya vibaya .

Mwisho