MKUU WA WILAYA YA MBOZI JOHN PALINGO AMEKABIDHIWA JUMLA YA MATUNDU 40 YA VYOO ILI KUTATUA CHANGAMOTO YA VYOO KATIKA SHULE ZA MSINGI

MBOZI-SONGWE

Akisoma risala ya ukamilishaji wa vyoo hivyo mbele ya mkuu wa wilaya, msoma risala Godfrey Kabuka amesema shirika lisilo la kiserikali la Heifer international limefadhili ujenzi wa majengo saba katika shule za Hatelele,Iwalanje,Isansa na Shiwinga ambapo jumla ya matundu ni 40 katika shule zote nne.

Aidha Kabuka amesema kuwa mradi huo umekamilika kupitia nguvu za wananchi huku shirika hilo likisaidia katika kutoa ushauri wa kiufundi na kuwezesha vitendea kazi na malighafi za ujenzi  ikiwemo simenti,nondo tofali na vifaa vingine vyote.

Akizungumza baada ya kupokea vyoo hivyo mwalimu wa afya katika shule ya msingi Isansa Lukamo Mwamwala ameishukuru taasisi hiyo kuwapatia msaada huo kwani wanafunzi walikuwa wakisumbuliwa na magonjwa ikiwemo kuhara hivyo kujengewa na kukamilika kwa vyoo hivyo kutaongeza idadi ya mahudhurio ya wananfunzi waliokuwa wakiogopa kupata magonjwa.

Baadhi ya wanafunzi wa shule hizo Amini Eksaudi,Jenifer Mtafya na Recho Alfredi wamesema kuwa vyoo hivyo ni bora   hivyo hawatokuwa na uoga wa kwenda kutumia vyoo hivyo kwani awali walikuwa na vyoo vilivyo chini ya kiwango na kuwafanya kushindwa kuvisafisha na kupelekea kushindwa kuvitumia vyoo hivyo na pia awali kulingana na idadi ya wanafunzi matundu ya vyoo yalikuwa hayawatosherezi.

Miongoni  mwa wazazi walioshuhudia makabidhiano hayo Lydia Njeje amesema wao kama wazazi wanashukuru kwa kuwa watoto wataondokana na haltari ya kupata magonjwa ya mlipuko kutokanan na uhakika wa mazingira bora ya vyoo hivyo kuwataka wanafunzi kuvitunza ili viwasaiodie.

Akipokea vyoo hivyo mkuu wa wilaya ya Mbozi John Palingo  amesema kuwa ujio wa mradi wa heifer utasaidia kupunguza tatizo kubwa la uhaba wa vyoo katika shule za msingi  na kuwataka viongozi mbalimbali pamoja na wananchi kujenga vyoo bora na salama katika makazi yao ili kusaidia kuepusha magonjwa ya mripuko pia  changamoto kubwa iliyopo ni maji hivyo amewataka kuangalia namna gani ya kutatua suala la upatikanaji wa maji na kuwakaribisha wadau wengine kusaidia kutatua changamoto za upungufu wa madawati,madarasa,pamoja na nyumba za walimu.