WANANCHI WALALAMIKIA MAENDELEO YA KIJIJI CHAO KUKWAMA

KYELA-MBEYA

WANANCHI wa vitongoji vitatu vilivyopo kijiji na kata ya Ipinda wilayani Kyela mkoani Mbeya,wameiomba halmashauri ya wilaya ya Kyela mkoani Mbeya kutatua mgogoro uliopo kati ya wenyeviti wa vitongoji na mwenyekiti wa kijiji ili kuharakisha maendeleo yaliyokwama kwa muda mrefu.

Kijiji cha Ipinda chenye wakazi zaidi ya elfu 10 kina vitongoji vitatu kupitia Chadema ambavyo wenyeviti hao wameingia kwenye mgogoro na mwenyekiti wa kijiji tangu achaguliwe,hali inayowalazimu wenyeviti hao wa vitongoji kuwajibika moja kwa moja kwa afisa mtendaji wa kata pasipo muhtasari wa kijiji.

Akizungumzia hali hiyo jana kwaniaba ya wananchi wengine,Esrael Kilanga mkazi wa Ipinda,alisema kwa muda mrefu sasa kijiji hicho kinazidi kudumaa kimaendeleo kutokana na kutoelewana kati ya wenyeviti wa vitongoji na wa kijiji na kwamba walipeleka malalamiko kwa diwani wa kata ili awakirishwe kwa mkurugenzi wa halmashauri lakini hadi leo kimya.

Kutokana na hali hiyo alisema wao kama wananchi wanamuunga mkono mwenyekiti wa kijiji licha ya kuwa wote wanatokana na Chadema lakini hawako tayari kushirikiana na wenyeviti wa vitongoji ambao wamekuwa wakifanya kazi pasipo ridhaa yao.

Akithibitisha kuwepo kwa sintofahamu hiyo,mwenyekiti wa kijiji cha Ipinda Sadat Mwambungu (CHADEMA) ni kweli hali hiyo ipo na kwamba imetokana na misimamo ya kuwatetea wananchi kwani kabla hajawa kiongozi kulikuwepo na michango ya mara kwa mara na kandamizi ambayo kwa sasa amepiga marufuku.

Alisema yeye aliingia madarakani katika uchaguzi wa mwaka 2014 lakini alifanyiwa vigisu na viongozi wa wilaya na kulazimika kuondolewa madarakani kwa sababu ya misimamo yake,na kwamba ulipoitishwa uchaguzi mungine alipita kura nyingi za mtikisiko ambapo hadi sasa anafanyiwa fitna iliyosababisha afarakane na viongozi wenzake.

‘’Haiwezekani wenyeviti wa vitongoji wachangishe fedha za maendeleo kwa wananchi pasipo muhtasari wa kijiji na hata kuwasomea mapato na matumizi,nimezuia michango hiyo,na kibaya zaidi wenyeviti hao wanawajibika kwa afisa mtendaji na diwani na nimepeleka malalamiko kwa mkurugenzi lakini hadi leo kimya’’alisema.

Diwani  wa kata hiyo Dr,Hunter Mwakifuna (CCM) licha ya kukiri kuwepo na sakata hilo,alisema hilo ni tatizo la mwenyekiti wa kijiji kwani amekuwa akifanya mambo yaliyo nje na sheria na kwamba kwa kufanya hivyo ndiyo maana wenyeviti wa vitongoji wanapoingana na maamuzi yake.

Dkt,Mwakifuna ambaye pia ni mwenyekiti wa halmashauri ya wilaya hiyo,alisema mwenyekiti Mwambungu amekuwa hapatani na baadhi ya wenyeviti  na wajumbe kwenye vitongoji kitu ambacho kimekuwa kikizorotesha maendeleo ya kijiji hicho na kuwa kwakuwa kipo kwenye kata yake analazimika kupambania maendeleo.

Mkuregenzi mtendaji wa Mussa Mgatta,suala hilo lipo jikoni linashughulikiwa na kwamba watazungumza na pande zote mbili ili kupata suruhu itakayoifanya  maendeleo ya kijiji hicho yasonge mbele.