BOMA FC YAIRARUA MAAFANDE WA MIGHT ELEPHANT 2 - 1

KYELA-MBEYA

TIMU ya soka ya Boma Fc yenye maskani yake wilayani Kyela mkoani Mbeya jana imefanikiwa kuitandika timu ya Might Elephant ya Songea mkoani Ruvuma inayomilikiwa na Jeshi la Wananchi (JWTZ)  mabao 2 – 1 nakujihakikishia kupanda ligi daraja la kwanza Tanzania bara hapo mwakani.

Katika mpambano ulifanyika kwenye uwanja wa Mwakangale wilayani hapa, timu ya Boma ilijipatia bao la kwanza katika dakika 45 kipindi cha kwanza kupitia kwa Godfrey Manyasi akiitendea vyema pasi maridadi ya Imanus Chepu.

Kipindi cha pili kilipoanza timu hizo zilishambuliana kwa zamu na kutokea pigani kupige langoni mwa timu ya  Boma ambapo katika 61 Might Elephant ilifanikiwa kusawazisha bao hilo.

Kufungwa kwa bao hilo kuliifanya timu ya Boma kugeuka mbogo wakitandaza kandanda safi ambapo “super sub” Lewis Mwasekaga alifanikiwa kufunga goli la pili katika dakika ya 75 ikimalizia pasi maridhawa toka kwa Gaudence Mwaikimba ambaye aliingia kipindi cha pili.

Katika dakika za lala salama Lewis Mwasekaga alitolewa nje kwa kadi nyekundu baada ya kubainika kufunga goli la tatu kwa mkono, hadi dakika 90 za mchezo zinamalizika timu ya Boma ilishinda kwa bao 2 – 1, na kufanikiwa kushika nafasi ya pili katika kundi lake lililotajwa kuwa la kifo.

Katika kundi hilo lenye timu 6, Green Warriors inaongoza ikiwa na alama 21, Boma inashika nafasi ya pili ikiwa na alama 18, Ihefu alama 16, Might Elephant alama 12, Mkamba Rangers alama 10 na inayoshika mkia ni Bukinafaso yenye alama 3.

Hata hivyo timu ya Boma huwenda ikapewa alama 3 kutoka kwa Bukinafaso baada ya kuikatia rufaa wakati ikicheza nayo ikiwachezesha wachezaji wa daraja la kwanza kinyume na taratibu.

Mchezo wa jana uliibuka na vurugu kubwa baada ya timu ya  Might Elephant kufanya vurugu kutaka kuwapiga waamuzi kwa madai kuwa waliwapendelea Boma Fc na kunyang’anya kamera za wanahabari, katika fujo hizo jeshi  la magereza lilifanikiwa kutuliza fujo hizo na kurejesha kamera za wanahabari.