ASILIMIA 80 WANANCHI WA MKOMBA WANAUGUA HOMA ZA MATUMBO KWA KUNYWA MAJI YASIYOSALAMA

 

MOMBA-SONGWE

ASILIMIA 80% ya wananchi wa vijiji vya Chole na Mkomba kata ya Mkomba wilaya ya Momba mkoani Songwe wanaugua homa za matumbo ikiwemo kipindupindu na kuhara kutokana na tatizo la kukosekana kwa maji safi na salama kwa muda mrefu.

Wakizungunza jana na gazeti hili walisema wanalazimika kutumia maji machafu yasiyo salama ambayo hata hivyo hayapatikaniki kirahisi hivyo kuiomba serikali katika bajeti yake ya mwaka 2017/2018 itoe kipaumbele vijijini  katika kutatua kero ya maji.

Menance Maarifa mkazi wa kijiji cha Chole,alisem kwa kuwa serikali imetenga billion 1.6 kutatua kero ya maji katika halmashauri ya wilaya ya momba, ambapo wameomba serikali itoe kipaumbele zaidi vijijini,kikiwemo kijiji cha Chole,na kutimiza lengo la kumtoa mama ndoo kichwani.

Ester Sichimbo,mkazi wa Mkomba,alisema ndoa zao zipo rehani kutokana na kugombana na waume zao pindi wanapochelewa kurudi nyumbani kwakuwa wanatoka alfajiri kwenda kutafuta maji na kurejea nyakati za jioni hivyo wamekuwa wakipigwa na kusababisha ndoa zao kuyumba.

Mwenyekiti wa kijiji cha Chole Damian Sichila,asilimia 80 ya wananchi wake wanaugua homa za matumbo na kwamba hata serikali ikija kuwapima watabaini hayo,na kuwa endapo bajeti ya mwaka huu serikali itakiangazia kijiji chake kuondoa kero ya maji tatizo hilo litakwisha na hatakesi za ndoa hazitakuwepo.

Diwani wa kata ya Mkomba Colletha Mwanselela alisema katika vitongoji 25 kwenye kijiji cha Chole ni kitongoji kimoja tu chenye unafuu wa maji huku vingine 24 havina maji na kuongeza kuwa katika bajeti ya mwaka 2016/2017 kata ya Mkomba ilitengewa fedha za maji million 16 lakini hazikutolewa, hivyo kuiomba halmashauri kuhakikisha bejeti ya mwaka huu inatekelezeka.

Juma Irando,mkuu wa wilaya hiyo,alisema kutokana na kuwepo kwa kero hiyo kwa muda mrefu amemuagiza mkurugenzi mtwndaji wa halmashauri hiyo kuhakikisha anapeleka fedha kwenye kijiji hicho kwa kuwa tayari Momba imetengewa Bilioni 1.6.

Kaimu Mkurugenzi Mtendaji wa halmashauri ya wilaya ya Momba,Maua Mgalla,licha ya kukiri kuwepo na tatizo hilo,aliosema katika bajeti ya mwaka huu kijiji hicho kitapewa kipaumbele ili kiondokane na kero hiyo.

Mathew Chikoti,Mwenyekiti wa halmashauri hiyo,alisema ni kweli kijiji hicho kinakabiriwa na ukosefu wa maji na kwamba katika bajeti ya mwaka huu atahakikisha Chole inapewa fedha za miradi ya maji na kuwa kutokana na wananchi wa kijiji hicho kuumwa magonjwa ya homa za matumbo,atawaagiza madaktari kwenda kuwapima na kuwapa tiba kesho kutwa.